Meta (segun e statuto)

Meta di OPPA ta pa organisa e pensionadonan publico cu ta biba na Aruba (of cu a yega di biba na Aruba) y asina defende e interesnan di su miembronan. Como un grupo di interes, nos pensionadonan ta haya asina un miho representacion den nos sociedad.

Nos tarea como miembro di directiva

• Nos tin un compromiso cu nos mes y tambe uno cu e organisacion cu nos ta representa.
• Nos tur ta na altura di e meta di OPPA y directiva ta haci tur posibel pa nos organisacion cumpli cu esaki.
• Nos tur tin e mesun responsabilidad, un responsabilidad comun, pa cu e organisacion cu nos ta representa, esey kiermen cu cada un di nos tin influencia riba funcionamento di directiva y riba tur decision tuma y tambe riba e forma di traha pa logra esaki.
• Ta imperativo pa cada un di nos mantene nos mes na e palabracionnan cu nos haci hunto como directiva.
• Bon comunicacion entre nos ta hopi importante pa nos logra ehecuta cada decision cu nos tuma como un team, esey kiermen cu nos mester di otro.
• Respet pa otro ta esencial ora cu tin diferencia di opinion y nos ta defende nos opinion cu argumentonan valido.
• Ta hopi importante pa nos ta flexibel ora cu e situacion y condicion cambia en conexion cu un decision tuma caba y cu mester adapta esaki.
• Tuma iniciativa, un persona cu ta tuma iniciativa, ta uno proactivo y ta haci mas di loke su descripcion di trabou ta encera.
• Nos tur cu ta den directiva t’ey pa sirbi nos miembronan.

Ta pa tur e motibonan ariba menciona ta hopi importante pa nos como miembro di directiva traha hunto.

Traha hunto

Traha hunto no ta facil pero bo ta forma parti di un organisacion cu ta exigi esey di bo.

Diferencia di opinion

Diferencia di opinion ta sano pero nos mester respeta opinion di otro si bo kier pa otro respeta esun di bo.

Importante

Opinion bo ta defende cu argumento valido, no cu menasa, insulto y tampoco gritando.

Ken por bira miembro di OPPA

• Tur persona cu ta ricibi un pensioen di Stichting Algemeen Pensioenfonds Aruba (APFA) y tambe esnan ta haya un “uitkering bij wijze van pensioen” for di land Aruba.
• Personanan cu ta ricibi pensioen for di APC (antes APNA) cu ta biba aki na Aruba.

Cantidad di miembro

Actualmente nos tin mas cu 1600 miembro.